Kanallarda hikoyalar, bir martalik media va boshqalar

Telegramning 10 yilligiga bagʻishlangan avvalgi yangilanishimizda foydalanuvchilar hikoyalar joylash imkoniyatiga ega boʻlgan edi. Bugundan boshlab kanallar ham yangi ovoz berish tizimi yordamida hikoyalar joylashi mumkin. Bundan tashqari, ilovada hikoyalar uchun reaksiya stikerlari va musiqa, shuningdek, koʻrilganidan keyin oʻchib ketadigan rasm va videolarni yuborish imkoniyati, yaxshiroq hisobga kirish ogohlantirishlari va boshqalar taqdim etildi.

Kanallar uchun hikoyalar

Endi Telegram foydalanuvchilari sevimli kanallariga hikoyalar joylash imkoniyatini ularga ovoz berish orqali hadya qilishi mumkin. Telegram Premium obunasi istalgan kanalga berishingiz mumkin boʻlgan 4 ta ovoz taqdim etadi.

Kanal koʻp ovoz olgani sari darajasi oshib boradi – har bir daraja uchun kanal obunachilarining tasmalariga kuniga qoʻshimcha 1 ta hikoya joylay oladi.

Foydalanuvchilar har 24 soatda bir marta ovozlarini boshqa kanalga koʻchirishi mumkin.

Kanallar obunachilardan t.me/durov?boost kabi maxsus havola yordamida ovoz berishni soʻrashi mumkin. Kanalingiz uchun ovoz havolasini olish va darajani oshirishga sizga qancha ovoz kerakligini koʻrish uchun Kanal profili > Yana > Statistika > Ovozlar rukniga kiring.

Kanalingiz hikoyalarni ochgach, Telegram Premium obunasi mavjud tegishli huquqlarga ega adminlar kanal nomidan joylash uchun kanal axboroti sahifasida belgisini bosishi mumkin.

Adminlar chatlari roʻyxatidan hikoyalar joylayotganida “Quyidagi nomidan hikoya joylash” variantini ham koʻradi.

Hikoyalarda reaksiya stikerlari

Foydalanuvchilar va kanallar hikoyalariga reaksiya stikerlarini qoʻshishi mumkin, bu uni koʻrganlarga shunchaki bitta bosish orqali yanada koʻproq emojilar bilan javob berish imkonini beradi. Kanallar tomonidan joylangan hikoyalarda har bir emojini necha kishi tanlaganini koʻrsatuvchi reaksiya hisoblagichlari aks etadi.

Reaksiya stikerini qoʻshish uchun stiker panelida belgisini bosing, keyin oynadagi oʻnlab variantlardan biror emojini tanlang. Premium obunachilari istalgan maxsus emojisidan ham foydalanishi mumkin.

Har kim har bir hikoyaga 1 ta reaksiya emojisini qoʻshishi mumkin, Premium obunachilari esa 5 tagacha qoʻsha oladi.

Hikoyalardagi musiqangiz

Qurilmangizdagi audio fayllardan hikoyalarda foydalanish mumkin, bu sizga maxsus saundtreklar yoki ovozli sharh bilan kontent yaratish imkonini beradi.

Stikerlar panelidan “Audio” bandini bosing va fayl tanlang, keyin biror qismni tanlash uchun trekni sozlang. Video hikoyalarda asl tovushni qoldirishingiz, shuningdek, kiritgan audiongizni istalgan nuqtaga harakatlantirishingiz, masalan, oʻrtasiga tovush effekti qoʻshishingiz yoki oxiriga musiqa qoʻshishingiz mumkin.

Bir martalik media

Telegram 2013-yilda oʻchib ketuvchi media funksiyasini qoʻshgan edi. Endi undan foydalanish yanada osonlashdi, yangi koʻrinish va Bir martalik sozlamasiga ega boʻldi.

Yakkama-yakka chatdagi media muharrirda belgisini bosish sizga rasm yoki videongiz ochilganidan keyin qancha muddat – bir martalikdan 30 soniyagacha koʻrinib turishini tanlash imkonini beradi. Bir martalik media qabul qiluvchi uni ochganida chatdan butunlay oʻchirib tashlanadi.

Barcha oʻchib ketuvchi medialar kabi saqlash va skrinshotlar olish bir martalik media uchun ishlamaydi.

Yangi hisobga kirish ogohlantirishlari

Kimdir hisobingizga kirganida Telegram barcha qurilmalaringizga bildirishnoma yuboradi. Buni yanada koʻrinadigan qilish uchun yangi kirishlar endi chatlar roʻyxati yuqori qismida ushbu ogohlantirishni chiqaradi.

Agar yangi qurilmada hisobingizga kirmagan boʻlsangiz, hisobingizni darhol himoyalash uchun Yoʻq, bu men emasman!” tugmasini bosing. Siz hozirda xabarlaringizga ruxsati bor barcha qurilmalarni Sozlamalar > Qurilmalar ruknida tekshirishingiz mumkin.

Qoʻshimcha himoya uchun Sozlamalar > Maxfiylik va xavfsizlik > Ikki bosqichli tekshiruv ruknida Ikki bosqichli tekshiruv parolini kiritishingiz mumkin.

Hech qachon login kodlari yoki parolingizni chatlaringizga ochish uchun Telegramda hisobingizga kirishingizdan tashqari hech qayerga kiritmang.

Va boshqalar

Dasturchilar oʻnlab xatolik tuzatmalari va optimallanishlarni qoʻshdi. iOS foydalanuvchilari videolar yuborish yaxshilanganini sezadi – endi u tezroq va natija paneli yanada aniqroq. Android foydalanuvchilari spoyler animatsiyalarini, jumladan, bir martalik va berkitilgan media koʻrayotganda unumdorlik yaxshilanganini sezadi.

Buguncha shular. Kanallar hikoyalarini koʻrayotgan vaqtingizda keyingi yangilanish ustida ishlayotgan boʻlamiz.

2023-yil, 22-sentabr
Telegram jamoasi