Топтағы тақырып, жиынтық қолданушы аты, бейнехатты мәтінге түрлендіру және т.б.

Бүгінгі жаңарту үлкен топтардағы талқылауларды басқару үшін тақырыптарды, блокчейнмен қорғалған жиынтық қолданушы аттарын, бейнехаттарды мәтінге түрлендіру мүмкіндігін және т.б. функцияларды қосады.

Топтағы тақырып

Telegram топтары жүздеген мың пайдаланушысы бар алып қауымдастықтарды сыйдыра алады. Чаттарды оқуға ыңғайлы ету үшін кез келген топ енді тақырыптарды қосып, кез келген мәселе үшін бөлек кеңістіктер жасай алады.

Тақырыптар топ ішіндегі жеке чаттар сияқты жұмыс істейді: олардың өздерінің ортақ медиафайлдары мен мәлімдеме баптауы болады. Мүшелер анимеден бастап жануартануға дейінгі кез келген тақырыпта сауалнамалар, бекітілген хаттар және боттар сияқты сүйікті құралдарын қолдана отырып сөйлесе алады.

Бұл мүмкіндік арнайы үлкен топтарға арналған. Жыл соңына қарай біз шағын топтарға арналған басқа да құралдар жиынтығын ұсынуды жоспарлап отырмыз. Тақырыптарды сынап көргіңіз келсе, мына жария топқа кіріп көріңіз.

Топ әкімшілері тақырыптарды топ баптауында қоса алады, ал Рұқсат бөлімінде кімге тақырыптар жасауға және басқаруға болатынын реттей алады.

Telegram-дағы барлық нәрсе сияқты, алдағы жаңартулар бұл мүмкіндікті әрі қарай дамытып, әкімшілер мен қолданушылар үшін қуатты құралдар қосады.

Жиынтық қолданушы аты

Telegram қолданушыларына қолданушы аттары арқылы басқалармен байланысу немесе ашық топтар мен арналарды табу оңай. Енді әр тіркелгіңіз бен ашық чаттарыңызға бірнеше жиынтық қолданушы атын иелене аласыз.

Жиынтық қолданушы аттарына иелік ету құқығы жылдам әрі ауқымды блокчейн желісі — TON арқылы қорғалады. Оларды жаңа платформа арқылы сатып алуға немесе сатуға болады. Бұл — бағалы Telegram домендерін иеленудің қарапайым әрі қауіпсіз жолы.

Жиынтық қолданушы аттары әдеттегі @usernames сияқты жұмыс істейді: олар ғаламдық іздеу нәтижелерінде көрінеді және Telegram-нан тыс жерде қолдануға болатын жеке сілтемелері бар: username.t.me және t.me/username.

Бейнехатты мәтінге түрлендіру

Telegram Premium іске қосылғаннан бері жазылушылар дауысхаттарды тыңдау ыңғайсыз болған кездерде оларды мәтінге түрлендіре алатын. Бұл жаңартумен осы мүмкіндік бейнехаттарға да қосылды. Енді Premium қолданушылары жылдам мәтіндік танылу ала алады.

Жаңа эмоджи жинағы

Мыңдаған қолданушы жеке эмоджи жинақтарын жүктеп жатқанда, Telegram суретшілері 12 жаңа эмоджи жинағын дайындап бітті. Premium қолданушылары бұл эмоджилерді кез келген хат пен сипаттамада қолдана алады немесе Хэллоуинге орай статус ретінде қоя алады.

iOS-та қайта жасалған түнгі режім

iOS қолданушылары үшін түнгі кейіп жаңартылды: чаттар мен тізімді айналдыру кезінде түстер теңгерімдірек болып, бұлыңғыр әсерлері жақсарды.

Android-та мәтін өлшемін өзгерту

Android жүйесіндегі чат баптауында мәтін өлшемін өзгерткенде, енді чаттағы барлық мәтіннің, соның ішінде сілтемелер көрінісі, жауап беру тақырыптары және т.б. өлшемі ұлғаяды.

Кішігірім дизайн жақсартулары

Хатқа солға қарай сырғыту арқылы жауап бергенде жаңа анимация пайда болды. Қолданушының бейініндегі телефон нөмірін басу бірнеше қоңырау шалу нұсқалары бар жаңа мәзірді ашады. Ал Telegram топтағы немесе арнадағы хаттарды жүктеп жатқан қысқа сәттерде жаңа пульсациялық орын толтырғыштарды көресіз.

Жаңа интерактивті эмоджи мен реакция

Оқып жатқан, ұйықтап жатқан немесе күдіктеніп отырған сәттер үшін бұл жаңарту 4 жаңа интерактивті эмоджи әкелді. Олар жеке чаттарда толық экранды әсерлерді көрсетеді және реакция ретінде де қолданыла алады. Сонымен қатар барлық қолданушы кез келген чатта Хэллоуин рухындағы тағы 3 реакцияны қолдана алады.

Бүгінгі өзгерістер осы. Биыл Хэллоуинді уақытында атап өте алмағанымыз үшін кешірім сұраймыз, себебі Apple жаңартуды тексеруге екі апта уақыт жұмсады.

Толық оқиғаны және біз қалай төтеп бере алатынымыз туралы негізін қалаушымыздың мына жазбасынан оқи аласыз.

2022 жылы 5 қараша
Telegram командасы