Kirish kalitlari, hadya xaridi takliflari va boshqalar

Bugungi yangilanishda SMS kodlarsiz tezkor kirish uchun xavfsiz kirish kalitlari, ichki firibgarlikdan himoya tizimiga ega hadya xarid qilish takliflari va profilingizdan hikoyalarga audio qoʻshishning oddiy usuli taqdim etiladi.

Kirish kalitlari

Endi siz SMS kod oʻrniga PIN kod yoki Face ID va barmoq izlari kabi biometrik maʼlumotlar bilan Telegramga bir zumda kirish uchun qurilmangizda kirish kaliti yaratishingiz mumkin.

Kirish kalitlari istalgan joyda, istalgan vaqtda ishlaydi — hatto safarda boʻlsangiz, qishda chekka sohilda dam olayotgan boʻlsangiz yoki SMS xizmatingiz uzilib qolsa ham.

Kirish kalitlaringiz uchun unikal shifrlangan kalitlar qurilmangizda saqlanadi hamda iCloud, Google va boshqa parol boshqaruv ilovalari bilan sinxronlanishi mumkin. Bu kirish kalitlarini nafaqat eng tezkor kirish usuli, balki eng xavfsiz ham qiladi.

Kirish kaliti yaratish uchun Sozlamalar > Maxfiylik va xavfsizlik > Kirish kalitlari rukniga kiring — buni istalgan qurilmada amalga oshirishingiz mumkin. Savol-javob boʻlimimizda batafsil oʻqing.

Lekin hali SIM kartangizni tashlab yubormang! Kirish kaliti yoqilgan boʻlsa ham, hisobingiz siz nazorat qiladigan faol telefon raqami bilan roʻyxatdan oʻtganiga ishonch hosil qiling.

Hadya xaridi takliflari

Foydalanuvchining profilida hadyani koʻrayotganingizda endi hadyani yulduzlar yoki TON orqali sotib olish uchun taklif qilishingiz mumkin.

Hadya takliflari Telegram tomonidan himoyalanadi va Telegramda bevosita savdolarni amalga oshirish uchun qulay va xavfsiz usulni taqdim etadi — bu esa ham xaridorlar, ham hadya egalarini firibgarliklardan himoya qiladi.

Taklif qilganingizda narx va vaqt limitini belgilaysiz. Taklif muddati davomida toʻlovingiz bandlanadi. Agar taklif rad etilsa yoki muddati tugasa, toʻlovingiz toʻliq miqdorda darhol qaytariladi.

Taklif qilish uchun hadyani koʻrayotganda ⋯ yoki ⋮ tugmasini bosing va “Sotib olish uchun taklif qilish” bandini tanlang.

Kimdir hadyangizni sotib olishni taklif qilsa, taklif qilingan summa uning taxminiy qiymatiga qanchalik yaqin ekanini koʻrasiz. Sotuvni tasdiqlaganingizdan keyin hadya xaridorga avtomatik tarzda oʻtkaziladi.

Hikoyalarda audio

Hikoya joylaganingizda endi profilingiz pleylistidan tezda audio qoʻshishingiz mumkin.

Shunchaki Stiker tugmasi > Audio bandini bosing va Saqlangan musiqa ruknidan fayllarni tanlang.

Konkida uchayotganingizdan, qish uyqusidaligingizdan yoki ekvatordan pastda yozdan zavqlanayotganingizdan qatʼi nazar, haftangiz ajoyib oʻtsin!

2025-yil 12-dekabr
Telegram jamoasi